9-may — Xotira va Qadrlash kuni munosabati bilan Madaniyat, sport va turizm xodimlari kasaba uyushmasi Samarqand viloyat birlashgan qoʻmitasi tizimida faoliyat koʻrsatgan nuroniylar oʻrtasida “Sogʻlom va zavqli hayot uchun!” shiori ostida sogʻlomlashtirish musobaqasi oʻtkazildi.

Madaniyat, sport va turizm xodimlari kasaba uyushmasi Samarqand viloyat birlashgan qoʻmitasi, viloyat sportni rivojlantirish boshqarmasi, Mahalla va nuroniylarni qoʻllab-quvvatlash viloyat boshqarmasi hamkorligida oʻtkazilgan musobaqada tuman va shaharlardan 200 nafarga yaqin nuroniy otaxon va onaxonlar ishtirok etishdi. Ushbu sogʻlomlashtirish musobaqasida Jismoniy tarbiya va sport boʼyicha mutaxassislarni qayta tayyorlash va malakasini oshirish instituti Samarqand filiali professor-oʼqituvchilari Xamrakul Rafiyev, Ubaydulla Qosimov, Rajabboy Sohibnazarov, Salomxon Hakimovlar ham ishtirok etishdi.

Sogʻlomlashtirish musobaqasi yugurish, basketbol toʻpini savatchaga tushirish, shaxmat, shashka kabi turlar boʻyicha oʻtkazildi. Har bir ishtirokchi avvalo, shifokorlar koʻrigidan oʻtkazilib, belgilangan sport turlariga yoʻnaltirildi. 

Shuningdek, musobaqa doirasida yurtimiz sportini rivojlantirishga munosib hissa qoʻshgan bir guruh sport faxriylariga “Oʻzbekiston sporti faxriysi” koʻkrak nishonlari topshirildi.