O‘ZBEKISTON RESPUBLIKASI TURIZM VA SPORT VAZIRLIGI
JISMONIY TARBIYA VA SPORT BO‘YICHA MUTAXASSISLARNI QAYTA TAYYORLASH
VA MALAKASINI OSHIRISH INSTITUTI


Sayt test rejimida ishlamoqda!
Jismoniy madaniyat sohasining bilimdoni Hamroqul Tolibovich Rafiyev haqida
  • 12-окт-2021, 17:00
  • admin
  • 35
  • 0

Jismoniy madaniyat sohasining bilimdoni Hamroqul Tolibovich Rafiyev haqida


Respublikamizda jismoniy tarbiya va sportni yanada rivojlantirish, ommalashtirish hamda soha mutaxassislarini tayyorlashda malakali ustoz va murabbiylarning o’rni beqiyosdir. Ularning fidokorona mehnatlari, samarali xizmatlari sababli sohada ijobiy o’zgarishlar yil sayin ortib borayapti. H.Rafiyevni ana shunday ustozlar sirasiga kiritish mumkin. 

Hamroqul Tolibovich Rafiyev 1939-yil 5-iyunda Samarqand shahrida ishchi oilasida tug’ildi. 1957-yil Samarqand temir yo’l transporti texnikumini bitirib, 1958–1959-yillarda temir yo’l sohasida xizmat qildi.

        Sportga bo’lgan qiziqish, uni 1960-yilda O’zbekiston davlat jismoniy tarbiya institutiga yetakladi. U Respublikada xizmat ko’rsatgan sport ustozi A. Vink rahbarligida yengil atletikaning bosqon uloqtirish turi bo’yicha o’z  mahoratini oshirib borib turli respublika va sobiq ittifoq miqyosidagi sport musobaqalarida qatnashib, sovrinli o’rinlarni qo’lga kirita boshladi.  U, o’qishni, sportni katta jamoatchilik ishlari bilan birgalikda muvofiqlashtirib olib bordi. Buning uchun u ikkinchi kursdan boshlab davlat stipendiyasiga loyiq deb topildi. Institut yoshlari, uni o’zlarining yetakchisi etib saylashdi. Shu bilan bir qatorda Toshkent shahridagi, institut joylashgan tuman, shahar, viloyat, Respublika yoshlar tashkilotlarining a’zosi, 1963-yil Respublika Talabalar Kengashi rahbari etib tayinlandi.O’sha davr talabalarini ta’lim-tarbiyasini kuchaytirishga, respublika Yoshlar markazini tashkil etish tashabbuskori bo’ldi.Undagi sport va ilmga bo’lgan jo’shqinlikni ko’rgan institut ma’muriyati uning ilmiy ish qilishiga ishonch bildirdi. U talabalik yillaridayoq dosent M. L.Shapiro rahbarligida dastlabki ilmiy tadqiqot ishlarini olib bordi. Yosh bosqon uloqtiruvchilar bilan o’tkazilgan ilmiy tadqiqoti bilan respublikada g’olib topildi. Keyinchalik, ya’ni, 1964 yilda institutni imtiyozli diplom bilan bitirib, shu dargohning “Yengil atletika” kafedrasida o’qituvchi bo’lib ishga qoldi. O’sha davrlarda jismoniy tarbiyaga oid o’zbek tilidagi o’quv qo’llanmalar deyarli yo’q bo’lib, barcha darslar rus tilida olib borilardi. 1965-yilga kelib, endi ish boshlagan yosh, iste’dodli X.Rafiyev bu dolzarb muammoni hal qilish maqsadida O’zbekistonda birinchilardan bo’lib “Yengil atletika” darsligini o’zbek tiliga tarjima qildi. Kitob 1972-yilda “O’qituvchi” nashriyotida bosilib chiqdi. Bu O’zbekistonda Jismoniy madaniyat ta’limi sohasida o’zbek tilida adabiyotlar yaratishda katta tarixiy voqyea bo’ldi. Birinchidan, yengil atletika darsligi o’zbek tilida chop etilishi, bo’lajak oliy ma’lumotli mutaxassislarni, barcha qiziquvchilarni yengil atletikani chuqur o’rganishga yordam berib, mamlakatda yengil atletikani rivojlanishiga katta hissa qo’shgan bo’lsa, ikkinchidan, o’zbekistonda sport sohasida o’zbek tilida o’quv adabiyotlarini yaratishga,  o’qitilishiga asos solindi. Uchinchidan, rus tilidagi “Fizicheskaya kultura” ni o’zbek tilida “Fizkultura” yoxud “jismoniy tarbiya”  emas, “Jismoniy madaniyat” deb qo’llashni, hamda jismoniy madaniyat sohasidagi asosiy tushuncha va atamalarini o’zbek tilida tartibli qo’llashni ham ilmiy, nazariy, amaliy tomondan asoslab berdi. To’rtinchidan, jismoniy madaniyat tushuncha va atamalarining o’zbek tilidagi muqobillarini yaratishga asos soldi.

          H. Rafiyev o’zining jismoniy madaniyat sohasidagi bilim va sportdagi ilmiy-amaliy tajribalarini amalga oshirishda o’sha davrda sport sohasiga oid ilmiy-nazariy bilim, ilmiy-amaliy faoliyatidagi yutuqlari bilan, jahonga taniqli pedagog olimlar: Rossiya federasiyasida xizmat ko’rsatgan fan arbobi, mamlakatda xizmat ko’rsatgan ustoz, professor, N.G. Ozolin, professorlar A.D.Novikov, N.I. Ponamarev, V.G. Yakovlev, Zasiorskiy, L.P. Matveyev, I.N. Serimeyev, M.A. Godik va b. O’zbekistonda professorlar, A.I. Yaroskiy, I.A.Petrova, O.A. Rixsiyeva, S.Rajabov, O.Usmonov, R. Doniyorov, B. Normurodov, dosentlar, R.Ismoilov, A.X. To’raxo’jayev, F.Nasriddinov, V.I.Barishev, K.F.Bakuniyene, M.U. Tojiyev, Sh.N.Zokirov kabi ustozlarining ilm -tajribalarini o’rganib ulardan bahramand bo’ldi.O’rta maktabda jismoniy madaniyatni o’zbek tilida o’qitish ustida ilmiy izlandi. 1972-yilda O’zbekistonda mahalliy kadrlar orasidan jismoniy tarbiya va sport sohasida dastlabki pedagogika fanlari nomzodi bo’ldi va 1974-yil dosent ilmiy unvoni berildi. Keyinchalik kafedra mudiri vazifasida ishlab, O’zbekiston respublikasi Oliy va o’rta maxsus ta’limi, hamda xalq ta’limi vazirliklarida jismoniy madaniyat sohasi bo’yicha ilmiy, o’quv-uslubiy kengashlarini boshqarib, oliy ta’lim, o’rta maxsus, ta’lim muassasalari talabalari, umumta’lim o’rta maktablari o’quvchilarining jismoniy madaniyat ta’limini chuqurlashtirishni takomillashtirishga oid ilmiy-uslubiy, tashkiliy tadbirlarni amalga oshirdi.

          1974-yilda SamDPIda  jismoniy tarbiya fakulteti dekani lavozimiga tayinlandi. Fakultetda, kafedralarda kadr tayyorlash sifatini oshirish maqsadida ta’lim-tarbiya, ilmiy-uslubiy sport salohiyatini yuksaltirishga, moddiy texnika bazani mustahkamlashga katta e’tibor berdi. Tog’da joylashgan sog’lomlashtirish sport maskanida u kishini rahbarligida suzish basseyni qurildi. 1977-yilda esa yana O’zDJTIda prorektor, 1982-yildan 1987 yillargacha Samarqand viloyat partiya qo’mitasida mas’ul xodim, 1987-1991-yillari  viloyat jismoniy tarbiya va sport qo’mitasida rais bo’lib ishladi. Viloyat Xalq deputati, Viloyat Kengashi a’zosi, Voyaga yetmaganlar va yoshlar hay’ati rahbari sifatida faoliyat olib bordi. Mustaqil O’zbekistonda milliy Olimpiya qo’mitasini tashkil qilishda, Olimpiya harakatini halqimiz orasida targ’ib qilishda faol ishtirok etib, uning dastlabki ijroqo’mi a’zosi etib saylandi. Bu davrda viloyatda o’nlab yangi o’yingoh, suzish havzalari va sport zallari qurildi. Bugungi kunda dunyoda sanoqli bo’lgan Samarqand eshkak eshish kanali va qayiqsozlik zavodning barpo etilishiga o’z hissasini qo’shdi. Shuningdek, aynan shu davrda viloyatimizda birinchi jahon chempionlari H.Mamatqulov (og’ir atletika ), Gamlet Ilyosov (boks), Navro’z Usmonov (yunon-rim kurashi) lar yetishib chiqib, viloyat sporti dovrug’ini dunyoga yoydi. Samarqand “Dinamo” futbol jamoasi sobiq ittifoq kubogi bahslarida ishtirok etdi. Davlatov respublika pedagogika istitutlararo respublika ilmiy konferensiyasida g’olib bo’ldi.   

Mustaqillik yillarida domlaning pedagogik ilmiy ijodi yanada barakali bo’ldi. 1992 yilda jismoniy madaniyat sohasida kadr va sportchilarni tarbiyalash bilan shug’ullana boshladi. Dastlab, SamDPI keyinchalik, SamDUda kafedra dosenti, mudiri, professori vazifalarida ishlab, nafaqat viloyatda, balki respublikada jismoniy tarbiya va sport rivojiga, yuzlab kadrlar tayyorlashga hissa qo’shdi. Jumladan, 1995 yili respublika jismoniy madaniyat fakultetlari uchun zamonaviy jismoniy madaniyat mutaxassisini tayyorlashga qaratilgan mukamallashgan “O’quv reja” sini ishlab chiqdi.Ushbu “O’quv reja” respublikada jismoniy madaniyat sohasida mutaxassislarni tayyorlash sifatini oshirishga imkon yaratdi.

Ayniqsa, mamlakatda jismoniy madaniyat sohasida yuqori malakali mutaxassislar tayyorlashda, sohani “jismoniy madaniyat” deb nomlash va bu sohada sifatli, jahon andozalariga mos keladigan raqobatbardosh mutaxassislarni tayyorlashni o’zbekiston respublikasida “Ta’lim to’g’risida”gi Qonuni hamda Kadrlar tayyorlash milliy dasturi asosida Davlat ta’lim standartlari, ularning o’quv rejalarini takomillashtirishga bag’ishlab katta ilmiy tadqiqotlar olib bordi. Bu borada 2000-2010 yillarda “Jismoniy madaniyat” bo’yicha mutaxassis tayyorlashning “O’quv rejasi”, keyinchalik   DTS lari “O’quv reja” lari bilan jismoniy madaniyat bo’yicha magistrlar tayyorlashni asoslab berib, dastlabki “O’quv reja” va DTSlarini ishlab chiqdi va ular respublika oliy o’quv yurtlaridagi “Jismoniy madaniyat” fakultetlarida amalda qo’llandi. 

H. Rafiyev sohaga oid 300 ga yaqin ilmiy maqolalar, 15 ta darslik, o’quv, ilmiy-uslubiy qo’llanmalar, hamda O’zbekiston Milliy ensiklopediyasidan joy olgan jismoniy madaniyat sohasining muallifi hamdir. 30 yil davomida 7000 dan ortiq jismoniy madaniyat sohasi tushuncha va atamalarni to’plab, 1998 yilda jismoniy tarbiya va sport atamalarining ruscha-o’zbekcha lug’atini chop ettirdi. Bugungi kunda ushbu lug’atdan soha mutaxassislari keng foydalanishmoqda. Domla O’zbekistonda jismoniy madaniyat sohasini rivojlantirishda o’ziga xos maktabini yaratdi. Sportning inson salomatligini mustahkamlashdagi ahamiyatini o’z hayoti misolida isbotladi.

2007-yilda Toshkentda o’tkazilgan “Universiada-2007” musobaqasining respublika bosqichida Samarqand yengil atletika jamoasining 2-o’ringa chiqazishga hissa qo’shib, viloyat terma jamoasi “Universiada – 2007” da sovrinli o’rinni egallab, prezident sovg’asi “Damas” avtomashinasi bilan taqdirlandi.

Yengil atletika bo’yicha o’zining kasbiy pedagogik sport mahoratini oshirishda u kishining yengil atletika bo’yicha turli xalqaro, mamlakat miqyosidagi sport musobaqalarida hakam, katta hakam, bosh hakamliklarni yuksak darajada amalga oshirganlari ham yordam berdi. U kishi 10 dan ortiq xalqaro, 50 dan ortiq sobiq ittifoq shaharlarida, 100 dan ortiq O’zbekiston hududida o’tkazilgan sport musobaqalariga hakamlik qilib “O’zbekistonning eng yaxshi hakami” nominasiyasida g’olib chiqqan. 

H.Rafiyev nafaqada bo’lsada, Jismoniy tarbiya va sport bo’yicha mutaxassislarni qayta tayyorlash va malakasini oshirish instituti Samarqand filialida professor lavozimida ishlab turib,  hamon o’zining sevib, umrini bag’ishlagan sohasida to’plagan katta, boy bilim-tajribalarini umumta’lim o’rta maktablari jismoniy madaniyat o’qituvchilariga ulashib kelish bilan, sohaning dolzarb muammolari ustida ilmiy tadqiqotlar o’tkazib, zamonaviy o’quv adabiyotlarini yaratish bilan mashg’ul bo’ldi. Shu bilan bir qatorda o’zini kasbiy pedagogik mahoratini ham oshirib keldi.

 Respublikada jismoniy madaniyat sohasi bo’yicha yuqori malakali kadrlar tayyorlash, jismoniy madaniyat jarayonlarida qadriyatlardan foydalanish, ayniqsa viloyatda bolalar sportini rivojlantirish, sport turlari bo’yicha federasiyalar faoliyatini takomillashtirish, yuqori malakali sportchilarni tayyorlash tizimini ishlab chiqdi. Mahallalarda jismoniy madaniyatni tashkil qilishga bag’ishlab, ilmiy tadqiqotlar o’tkazib, ularni respublika ilmiy konferensiyalarida ma’ruza qilib, ilmiy to’plamlarda, respublika jurnallarida chop ettirdi. 

Mamlakatda, viloyatda milliy xalq o’yinlari sport turlarining festivallarini tashkil qilishda ishtirok etib, ularni xalqimiz va ayniqsa, yoshlarni o’zlikni anglash, milliy qadriyatlarimizni chuqur o’rganish va e’zozlashga, ularni hurmat qilishga o’rgatishda munosib hissa qo’shib kelmoqda. Bu borada Jomboy va boshqa tumanlarda xalq o’yinlari festivallari, ayniqsa 2003-yilda SamDU da “Jismoniy madaniyat jarayonlarida milliy va umuminsoniy qadriyatlardan foydalanishni  takomillashtirish” “O’zbekistonda jismoniy tarbiya va sportni rivojlantirishning dolzarb muammolari” mavzularida tashkil qilgan respublika ilmiy-konferensiyalari katta ahamiyatga ega bo’ldi.

Keyingi yillarda professor U.Ibrohimov bilan hamkorlikda “Sport va qadriyat” nomli o’quv-uslubiy qo’llanma, 2012-yilda yakka mualliflikda “Yengil atletika va uni o’qitish metodikasi” o’quv qo’llanmasini chop ettirdi. Bu qo’llanma zarur o’quv qo’llanma sifatida 2013-2014-yillarda qayta nashr qilindi va respublika tanlovida birinchi o’ringa sazovor bo’ldi. Domlaning ijodxonasida sohaning  yana bir necha  fanlaridan darsliklar, o’quv qo’llanmalar, lug’atlar chop etish uchun navbat kutmoqda.

2013-yilda Xalqaro Olimpiya qo’mitasi qoshidagi “Sport hamma uchun” xalqaro federasiyasining, xalqaro yengil atletika federasiyasining maxsus seminarlarida ishtirok etib, Xalqaro olimpiya qo’mitasi hamda O’zbekiston milliy Olimpiya qo’mitasi prezidentlari imzolagan xalqaro sertifikatlarga ega bo’lib, markaziy Osiyo va Qozog’iston hamda boshqa mamlakatlarida jismoniy madaniyat, yengil atletika sporti sohasidan ma’ruzalar o’qish huquqiga ega bo’ldi.

H. Rafiyev mehnat faoliyatini katta jamoatchilik ishlari bilan bog’lab olib bormoqda. Hozir viloyat hokimligida jismoniy tarbiya va sport bo’yicha jamoatchilik hamda Sport faxriylar Kengashi rahbari, viloyat faxriylar va milliy sport turlari federasiyasi ijrochi direktori  sifatida faoliyat olib bormoqda.

Viloyat sport faxriylarini birlashtirib, ular o’rtasida  turli xil sog’lomlashtiruvi sport musobaqalari , uchrashuvlar, suhbatlar, qarovsiz, betob bo’lib qolgan sport faxriylarining xolidan xabar olishni uyushtirishga bosh-qosh bo’lib kelmoqda. Shu bilan bir qatorda viloyatda o’tadigan barcha xalqaro, respublika, viloyat miqyosida o’tkazilayotgan sport musobaqalarini tashkil qilishda, sport turlari bo’yicha, “Umid nihollari” , “Barkamol avlod”, “Universiada” musobaqalarini o’tkazish, viloyat terma jamoalarini respublika bosqichlariga muvofaqiyatli tayyorlashda yaqindan yordam berib kelmoqda. 

“Siz polvonlaringizni bilasizmi?” O’zbekiston milliy ensiklopediyasi jamiyatining Samarqanddagi vakili sifatida, viloyatda yashab o’tgan, hozirgi kunda yashab kelayotgan 400 dan ortiq mashhur polvonlar haqida ma’lumotlarni to’plashga bosh-qosh bo’lib, ularni nomini abadiylashtirib, ularning ibratli hayotiy tajribasi, amalga oshirgan jasoratlari asosida yoshlarni tarbiyalashga o’zining munosib hissasini qo’shib kelmoqda.

2014-yilda H.Rafiyev rahbarligida Nizomiy nomidagi Toshkent davlat pedagogika universiteti mutaxassislari bilan hamkorlikda ishlab chiqilgan, OTM larning umumiy jismoniy madaniyat kafedralari uchun “Jismoniy madaniyat davlat dasturi” ishlab chiqilib, o’zbekistonning barcha oliy ta’lim muassasalarida o’tkazilgan “Tajriba sinov” jarayonidan muvafaqiyatli o’tib, amalda tadbiq etildi 

2014-yilda uning kasb-hunar kollejlari talabalariga hamda umumta’lim maktablari o’quvchi yoshlari va barcha jismoniy tarbiya va sport mutaxassislariga mo’ljallab nashr etgan “Yengil atletika va uni o’qitish metodikasi” o’quv qo’llanmasi “Yilning eng yaxshi darsligi va o’quv adabiyoti muallifi” respublika tanlovining g’olibi sifatida oliy va o’rta maxsus, xalq ta’limi vazirliklari hamda “Iste’dod” jamg’armasining 1 darajali diplomi va sovrini bilan taqdirlandi.

2015-yilda O’zbekiston Respublikasida yoshlarga oid davlat siyosatini amalga oshirishning dolzarb masalalari II Respublika ilmiy-amaliy konferensiyasi materiallari “Yoshlarda sog’lom turmush tarzini shakllantirish va ularni ommaviy sportga jalb etishning ayrim masalalari” mavzusida qilgan ma’ruzasi eng yaxshi ilmiy ma’qola sifatida I o’ringa sazovor bo’lgan. Bu konferensiyada yoshlarni har tomonlama barkamol avlod qilib tarbiyalashda 8 ta takliflar kiritgan.

2015-yilda yil 25-fevralda O’zbekiston Respublikasining Birinchi Prezidenti Islom Karimov raisligida o’tkazilgan Bolalar sportini rivojlantirish jamg’armasining Homiylik Kengashining qaroriga muvofiq bolalar va o’smirlar sport maktablarida shug’ullanuvchi o’quvchi yoshlarni xorijiy tillarni chuqurroq o’rganishni amalga oshirish maqsadida “Inglizcha-O’zbekcha-Ruscha”, “O’zbekcha-Ruscha-Inglizcha” sport atamalarini lug’atlari Shavkat Butayev bilan hammualliflikda chop ettirdi. 

2014-2016-yillarda 20 dan ortiq respublika va xalqaro miqyosida o’tkazilgan ilmiy anjumanlarda ishtirok etib, mamlakat yoshlari orasida jismoniy tarbiya va sportni ularning sog’lom turmush tarziga singdirish borasida o’tkazgan ilmiy tadqiqotlari natijalarini amalga oshirishga oid ma’ruzalar bilan ishtirok etib eng yaxshi ilmiy uslubiy amaliy takliflari bilan qatnashdi.

H.Rafiyevning butun umri yoshlarni har tomonlama komil inson qilib tarbiyalashga bag’ishlanib, yoshlar o’rtasida turli xil jismoniy, ma’naviy mavzularga bag’ishlab seminarlar tashkil qildi. Ayniqsa yoshlarni ibratli, katta yoshli avlod ibrati asosida tarbiyalashga ham katta hissa qo’shdi. Jumladan, Samarqand viloyatida o’quvchi-yoshlar o’rtasida “Siz polvonlaringizni bilasizmi?” to’garaklarini tashkil etib 400 dan ortiq nomdor polvonlarni qisqacha tarixini yaratib, o’quvchi yoshlarni ularning ibrati asosida tarbiyalashga hissa qo’shdi.

H.Rafiyev viloyatda, respublikada katta jamoatchilik ishlarini amalga oshirib kelmoqda. Jumladan, O’zbekiston milliy olimpiya qo’mitasi, Turizm va sport vazirligiga O’zbekistonda jismoniy tarbiya va sportni rivojlantirishni, yoshlarni jismoniy madaniyatini shakllantirish bo’yicha qimmatli fikrlari bilan maslahatlar berdi. Viloyat hokimi huzurida jismoniy tarbiya va sport sohasi bo’yicha jamoatchilik Kengashining rahbari sifatida viloyat aholisi va ayniqsa, yoshlari o’rtasida sportni rivojlantirishda katta hissa qo’shib kelmoqda. H.Rafiyevning tashabbusi bilan “O’zbekistonda jismoniy tarbiya va sport borasida amalga oshirilayotgan islohotlar: muammolar, yechimlar va istiqbollar” doimiy ilmiy-uslubiy seminar tashkil etilgan. 

2016-yilda O’zbekiston mustaqilligining 25 yilligiga bag’ishlab “Jismoniy madaniyat atamalarining ruscha-o’zbekcha lug’ati”ning II- nashrini chop ettirdi. Bu lug’at 7 mingga yaqin jismoniy tarbiya va sport atamalarini o’z ichiga olgan.

       2019-yildan jismoniy tarbiya va sport sohasi mutahassislarini qayta tayyorlash va malakasini oshirish markazi Samarqand filiali faoliyatini tashkil qilishda o’zining munosib hissasini qo’shib, jismoniy tarbiya metodikasi kafedrasining mudiri sifatida sohani rivojiga katta hissa qo’shib kelmoqda.Soha bo’yicha zamonaviy bilimlariga asoslangan ma’ruzalar o’qish bilan, halqaro va respublika ilmiy konferensiyasi yalpi yig’ilishlarida dolzarb muammolar yuzasidan ilmiy maruzalar o’qiydi. Shu bilan bir qatorda bo’lajak Olimp o’yinlariga ishtirok etuvchi sportchilarni xolidan habar olish va ularni ruhlantirib, muvaffaqiyatli ishtiroklariga munosib hissa qo’shdi. Tojli virus pandemiyasida odamlarni sog’ligini mustaxkamlashda jismoniy faolliklarini oshirishga qaratilgan roliklar bilan viloyat, respublika televidiniyasida maxsus chiqishlarni amalga oshirdi.

H.Rafiyev o’zining 61 yillik ilmiy pedagogik faoliyatida halollik, talabchanlik,qattiqqo’llik, adolat me’zonlari asosida minglab bo’lajak  jismoniy madaniyat mutaxassislari, o’nlab magistrlarni tayyorlash jarayoniga ishtirok etib, ularga  jismoniy madaniyat nazariyasi , jismoniy madaniyat asoslari, yengil atletika sportining ilmiy-nazariy asoslaridan hamda amaliyotidan ko’nikma malakalarini shakllantirib, yuzlab yuksak mahoratli sportchilarni, hakamlarni tayyorladi. Ular orasidan respublika chempionlari, xalqaro sport musobaqalarining g’olib va sovrindorlari yetishib chiqdi: Bobonazar Jiyanov, Tillo Rayimboyeva (Rasulova), Muxabbat Sultonova, Shavkat Gumirov, Toir Hakimov, Ozod G’ulomov, Abduvahob Bo’stonov, Farid Davlatov, Erkin Nurmatov, Habibillo Davlatov, Bobur Buzrukov va b. Jismoniy madaniyat sohasida o’zbekistonda yetishib chiqqan yetakchi olimlarimizdan professorlar, K.T. Shokirjanova, R.S.Salomov, R.Akromov, dos. F.Ahmedov va boshqalar H.Rofiyevni o’z ustozlari deb biladilar. Ba’zilari, U.Valiyev, X.Axmedov va b. jismoniy madaniyat sohasida tashkilotchi rahbar vazifalarida muvofaqiyatli faoliyat ko’rsatib keldilar va kelmoqdalar.

           Shogirdlaridan B. Shukurov, A.Xvan, K.Shokirjonova, T.Nazarov va boshqalar, “O’zbekistonda xizmat ko’rsatgan sport ustozi” unvonlariga ega bo’ldilar.

          H.Rafiyevning mamlakatda jismoniy madaniyat sohasini rivojlantirishda qo’shgan hissasi davlatimiz, vazirlik hamda mahalliy rahbariyat tomonidan munosib taqdirlangan. U kishiga “Mehnat fahriysi”, “Sport fahriysi”, “Xalq ta’limi a’lochisi”, Oliy va o’rta maxsus ta’lim vazirligi, O’zbekiston respublikasi xalq ta’limi vazirligi, Turizm va sport vazirliklari, O’zbekiston milliy olimpiya qo’mitasi hamda respublika yengil atletika federasiyasi, viloyat hokimligining va ko’pgina oliy ta’lim muassasalarining faxriy yorliqlari, tashakkurnomalari va boshqalar bilan taqdirlangan.

Domla H. Rafiyev turmush o’rtog’i Guljon aya bilan uch qiz va ikki o’g’ilni voyaga yetkazdi. Farzandlarining barchasi oliy ma’lumotli bo’lib, xalq xo’jaligining turli sohalarida samarali mehnat qilishmoqda. U kishi 14 nabira, 3 evaraning sevimli bobosi.

Ustozimiz H.Rafiyevni jamoamizning professor-o’qituvchi va ishchi xodimlari nomidan “1-oktyabr- o’qituvchi va murabbiylar kuni” bilan samimiy muborakbod etamiz va ishlarida muvaffaqiyatlar tilaymiz.


Salom Hakimov, Jismoniy tarbiya va sport bo’yicha mutaxassislarni qayta tayyorlash va malakasini oshirish instituti Samarqand filiali o’qituvchisi tayyorladi.



Boshqa yangiliklar

Sharhlar (0)


Sharh qoldiring

Kalendar 2021

«    Октябрь 2021    »
ПнВтСрЧтПтСбВс
 123
45678910
11121314151617
18192021222324
25262728293031